Kyrkja i Øvre Telemark har sidan 2017 markert FNs Flyktningdag med ei pilegrimsvandring. Onsdag 15. juni skjedde det i Kviteseid. Det var prosten i Øvre Telemark, Asgeir Sele, og diakonane i prostiet som sto bak invitasjonen.
I år kom vaksenopplæringane frå Seljord og Kviteseid samt prestane og diakonane i prostiet. Frå Kviteseid var også diakoniutvalet med. Seksti menneske vart det til slutt. I alle aldre, fire til åtti.
Etter tre kilometers vandring rundt kyrkja, var alle innbedne til ei lita musikkstund i kyrkja. Organist Olav Holm hadde sett saman eit program som spente frå Ole Paus til songar på ukrainsk. Mona Bøe frå Kirkens Nødhjelp heldt appell og fortalte om krig, konflikt og klimaendringar som gjer at over 100 millionar menneske er på flukt.
- Me har all grunn til å vera takksame for det me har og vera glade me har noko å dele, avslutta Mona Bøe.